फिफा अध्यक्षमा दोस्रो कार्यकालका लागि इन्फान्टिनो निर्विरोध निर्वाचित

0

विर्तामोड, २२ जेठ ।

फ्रान्सको पेरिसमा सम्पन्न फिफा कंग्रेसले वर्तमान अध्यक्ष जियान्नी इन्फान्टिनोलाई दोस्रो कार्यकालका लागि निर्विरोध चयन गरेको छ । कंग्रेसमा अध्यक्ष इन्फान्टिनोले ‘आपराधिक गतिविधिको जञ्जाल’बाट फुटबललाई यसको वास्तविक मूल्य र मान्यता दिलाउन सफल भएको प्रतिक्रिया दिएका छन् । यसअघि बसेको कंग्रेसले एक मात्र उम्मेद्वार रहेको अवस्थामा मतदान आवश्यक नरहने भनेर विधान संशोधन गरेको थियो ।

४९ वर्षे अधिवक्ता इन्फान्टिनोले पहिलो कार्यकालमा दिएको आश्वासन पूरा गर्न प्रयास गर्नेछन् । पहिलो कार्यकालमा फिफा सदस्यहरु नै उनको काम प्रति सन्तुष्ट देखिएका छैनन् । ‘अहिले कसैले पनि फिफाको संक्रमणका बारेमा कुरा गरेका छैनन् । भ्रष्टाचारका प्रकरणहरु पछिल्लो चार वर्षमा कतै पनि सुनिएन । फुटबल सकारात्मक दिशा तर्फ अघि बढेको छ’, इन्फान्टिनोले फिफा कंग्रेसमा भनेका छन् । इन्फान्टिनोले आफ्नो कार्यकालमा भएका ११ वटा सकारात्मक कार्यक्रमको व्याख्या गरे । जसमा आर्थिक पाटो, महिला फुटबलको विकास, रंगभेदविरुद्धको अभियान, भिडियो एसिस्टेन्ट रेफ्री, क्लब विश्वकपमा २४ टिमको सहभागिताको निश्चितता लगायतका कार्यक्रमहरुले विश्व फुटबललाई अझ व्यापक बनाएको दाबी गरेका थिए । ००००००

Share.

Leave A Reply