भारतको लोकसभा चुनावको दोस्रो चरण अन्तर्गत ९५ सिटको लागि भएको चुनाव सम्पन्न

0

विर्तामोड, ५ बैशाख ।

भारतको लोकसभा चुनावको दोस्रो चरण अन्तर्गत आज १२ राज्य र एक केन्द्र प्रशासित प्रदेशका ९५ सिटको लागि भएको चुनाव शान्तिपूर्णरूपमा सम्पन्न भएको भारतीय निर्वाचन आयोगले जनाएको छ । भारतमा जारी लोकसभा निर्वाचन अन्तर्गत दोस्रो चरणको चुनावमा आज १२ राज्य र एक केन्द्र शासित प्रदेशका ९५ सिटका लागि मतदान भएको हो । दोस्रो चरणमा ६१ प्रतिशतभन्दा बढी मत खसेको भारतीय निर्वाचन आयोगले जनाएको छ । दोस्रो चरणमा भारतको आसाम, विहार, छत्तिसगढ, जम्मु–कश्मीर, कर्नाटक, महाराष्ट्र, मणिपुर, उडिशा, पाण्डेचरी, तमिलनाडु, त्रिपुरा, उत्तर प्रदेश र पश्चिम बंगालका ९५ सिटका लागि निर्वाचन भएको हो । विद्युतीय मतदान मेसिन (इवीएम) मा आएका केही प्राविधिक समस्याका कारण उडिशाका चार मतदान केन्द्रमा पुनः निर्वाचन गराउने निर्णय पनि निर्वाचन आयोगले लिएको छ । उडिसा राज्यमा एक जना निर्वाचन अधिकारीलाई माओवादी विद्रोहीहरूले एम्बुसमा पारी गोली हानी हत्या गरेका बताइएको छ । प्रधानमन्त्री नरेन्द्र मोदी दोस्रो कार्यकालका निम्ति निर्वाचित हुने अभिलाषासाथ अभियानमा सहभागी हुनुहुन्छ भने विपक्षी कङ्ग्रेसले उहाँलाई कडा चुनौती दिइरहेको विश्लेषकहरूले बताएका छन् । यो चुनावलाई प्रधानमन्त्री मोदीप्रति जनमत सङ्ग्रहको रूपमा पनि हेरिएको छ । भारतको लोकसभा निर्वाचनलाई विभिन्न सात चरणमा सम्पन्न गर्ने कार्यतालिका अनुसार दुई चरणको निर्वाचन सम्पन्न भइसकेको छ । मे १९ मा अन्तिम चरणको मतदान सकिएपछि मे २३ मा मतगणना हुनेछ । ००००००

Share.

Leave A Reply