राष्ट्रिय अखण्डताका बिषयमा जनमत संग्रह हुनै नसक्ने प्रधानमन्त्री ओलीको जिकिर

0

विर्तामोड, २७ फागुन ।


प्रधानमन्त्री केपी शर्मा ओलीले राष्ट्रिय अखण्डताका बिषयमा जनमत संग्रह हुनै नसक्ने बताउनुभएको छ । राष्ट्रिय सुरक्षा परिषदको सचिवालयको १८ औं बार्षिकोत्सवलाई आज सिंहदरबारमा सम्बोधन गर्दै प्रधानमन्त्री एवं परिषदका अध्यक्ष ओलीले सो कुरा बताउनु भएको हो । प्रधानमन्त्री ओलीले पृथकतावादी समुह सानो भए पनि त्यो विशाक्त हुने भएकोले त्यसलाई नियन्त्रण गर्नु सरकारको दायित्व भएको स्पष्ट पार्नु भएको छ । “पृथकतावाद सानो भए पनि त्यो घातक हुन्छ । त्यसैले यसलाई सरकारले महत्व दिएर नै निस्तेज पारेको हो” प्रधानमन्त्री ओलीले भन्नुभयो “राष्ट्रिय अखण्डताका बिषयमा जनमत संग्रह हुनै सक्दैन । यस बिषयमा कसैले चिन्ता नगरे हुन्छ ।”


प्रधानमन्त्री ओलीले पृथकतावादको अन्त्य हुँदा एकथरि मान्छे मुरमुरिएको देखेर आफू आश्चर्यमा परेको बताउनु भएको छ । “नेपालबाट पृथकतावादी गतिविधि निस्तेज हुँदा एकथरि मान्छेहरु पानी बिनाको माछा जस्तो भुट्भुटिएका छन्” प्रधानमन्त्री ओलीले भन्नुभयो “राष्ट्रिय अखण्डता र सार्वभौमसत्तामा आँच पु¥याउने कुरामा जनमत संग्रह गर्ने भन्ने कुरा सोच्न पनि नमिल्ने कुरा हो ।”
प्रधानमन्त्री ओलीले विभिन्न आवरणमा चन्दा लिने, लुटपाट गर्ने कुरा सरकारलाई मान्य नहुने प्रधानमन्त्री ओलीको भनाइ छ । “देशको शान्ति सुरक्षा र अमनचयन खल्बल्याउने कुनै गतिविधि सरकारलाई मान्य हुँदैनन् ” प्रधानमन्त्री ओलीले भन्नुभयो, “कोही मृत संस्था जिवीत गराउने सपना देख्छन्, कोही क्रान्तिका नाममा जनता अल्मल्याउने कुरा गर्छन् । ती दुवै कुरालाई निस्तेज पारिन्छ । ”
देशको अखण्डता, सार्वभौम सत्ताको रक्षा र राष्ट्रिय सुरक्षाका लागि सुरक्षा परिषदले निर्वाह गरेको भूमिकाको प्रधानमन्त्री ओलीले प्रशंसा गर्नुभएको छ । ००००००

Share.

Leave A Reply