विदेशी चिया बिक्रेताद्वारा नेपाली चियाको प्रशंसा, प्राङ्गरिक रूपमा नै विकास गर्नसक्दा विश्वमा हारालुछ शैलीमा बिक्री हुनसक्ने

0

विर्तामोड, २१ चैत ।

नेपाली चियाले अन्तर्राष्ट्रियस्तरमा अहिले पनि राम्रो बजार लिनसकेको छैन । सरकारी पक्षबाट यसमा चासो नदिएको भन्दै उद्यमी र किसानले आरोपसमेत लगाउँदै आएका छन् । तर, विदेशी चिया बिक्रेताले भने नेपाली चियाको प्रशंसा गरेका छन् । उनीहरूले नेपाली चिया प्राङ्गारिक भएको भन्दै यसलाई संसारको सबै देशमा र्पुयाउन सकिने बताएका छन् । इलाम सदरमुकाममा भएको एक कार्यक्रममा स्वीट्जरल्याण्डका चिया विज्ञ ल्याकुन्टेसले नेपाली चियाको भविष्य रहेको बताउनुभयो । उहाँले नेपालको वातावरणसमेत राम्रो रहेको भन्दै यहाँ चियालाई पहिलो प्राथमिकतामा राखेर काम गर्नुपर्ने औँल्याउनुभयो । उहाँले नेपाली चियालाई प्राङ्गरिक रूपमा नै विकास गर्नसक्दा विश्वमा हारालुछ शैलीमा बिक्री हुनसक्ने बताउनुभयो । तीन वर्षदेखि ल्याकुन्टेसले नेपालको चिया फ्रान्समा बिक्री गर्दै आउनु भएको छ । केन्द्रीय चिया सहकारी सङ्घसँगको समन्वयमा उहाँले नेपाली चियाको प्रचार गर्ने र बिक्री गर्नु भएको हो । यस्तै, स्वीस नागरिक ओलिवनले संसारका धेरै देशमा नेपालमा यस्तो चिया बन्छ भन्ने थाहा नभएको बताउनुभयो । उहाँले नेपाल पनि एक प्राकृतिक हराभरा भएको देश भएकाले चियाले यसको पहिचान दिलाएको बताउनुभयो । ’अरू देशमा कसले कस्तो चिया बनाए भन्नेमा तपाईंहरू चासो नलिनुहोस्,’ ओलिवनले भन्नुभयो, ’आफ्नो चियाको बजारीकरणमा ध्यान दिनुहोस् ।’ उहाँले नेपाली चिया विश्वकै गुणस्तरीय चिया भएको बताउनुभयो । चार वर्षदेखि नेपाली चियाको प्रवर्द्धनमा लाग्नु भएकी ओलिवनले नेपाली चिया स्वीट्जरल्याण्डमा समेत बेच्ने गर्नु भएको छ । कार्यक्रममा प्रदेशसभा सदस्य काजीमान कागतेले आफू चिया उद्यमी नै रहे पनि विदेशी नागरिकले समेत नेपाली चियाको प्रशंसा गरेकामा हर्षित भएको उल्लेख गर्नुभयो । उहाँले प्रदेश १ लाई चिया क्षेत्र घोषणा गर्नसमेत प्रदेश लागेको बताउनुभयो । ००००००००

Share.

Leave A Reply