ओमानमा चलिरहेको पाँच देश सम्मिलित टी–२० क्रिकेटमा नेपालले आज आयरल्याण्डसँग खेल्दै

0

विर्तामोड, २२ असोज ।


ओमानमा चलिरहेको पाँच देश सम्मिलित टी–२० क्रिकेटमा नेपालले आज आयरल्याण्डसँग खेल्दैछ ।
खेल नेपाली समय अनुसार बिहान सवा एघार बजे सुरु हुनेछ । आफ्नो पहिलो खेलमा हङ्कङलाई र दोश्रो खेलमा नेदल्याण्ड्सलाई समान चार विकेटले हराएको नेपालले आज टेष्ट मान्यता प्राप्त टोली आयरल्याण्डसँग खेल्न लागेको हो ।
नेपालले, दुई खेलमा राम्रो प्रदर्शन गर्न नसकेका पवन सर्राफ र रोहित पौडेललाई आज परिवर्तन गर्ने सम्भावना छ । आयरल्याण्डले प्रतियोगिताका तीनमध्ये दुई खेलमा जित हात पारेको छ ।
टेष्ट वरीयताको १२औंँ र एक दिवसीय वरीयताको ११ औंँ स्थानमा रहेको आयरल्याण्ड टी–२० को वरीयतामा भने नेपालभन्दा पछाडि छ । नेपाल र आयरल्याण्डले टी–२० क्रिकेटमा यसअघि एक पटक मात्र खेलेका छन् ।
सन् २०१५ मा भएको त्यो खेलमा नेपाल आयरल्याण्डसँग ८ विकेटले पराजित भएको थियो ।
यसैबीच, टी–२० क्रिकेटको नयाँ वरीयतामा नेपालको स्थान यथावत रहेको अन्तर्राष्ट्रिय क्रिकेट परिषद आईसीसीले जनाएको छ । आईसीसीले सार्वजनिक गरेको नयाँ वरीयतामा नेपाल ११ औंँ स्थानमा यथावत छ ।
एसोसियट देशहरुमा नेपाल सबैभन्दा अघि छ । टेष्ट राष्ट्र जिम्बावे र आयरल्याण्ड नेपाल भन्दा तल छन् । टी–ट्वेण्टी वरियताको शीर्ष स्थानमा पाकिस्तान र दोस्रोमा इंग्ल्याण्ड यथावत छन् । दक्षिण अफ्रिका तेस्रो, भारत चौंथो र अष्ट्रेलिया पाँचौं स्थानमा छन् । एक दिवसीय वरियतामा नेपाल १७ औंँ स्थानमा छ । ००००००

Share.

Leave A Reply