यातायात व्यवस्था कार्यालय झापाद्वारा ९३ करोड रुपैयाँ राजस्व सङ्कलन 

भद्रपुर (झापा), २० भदौ ।
यातायात व्यवस्था कार्यालय झापाले गत आर्थिक वर्ष २०८०/८१ मा ९३ करोड २१ लाख ६६ हजार आठ सय १३ रुपैयाँ राजस्व सङ्कलन गरेको छ । कार्यालयले आर्थिक वर्ष २०७९/८० को तुलनामा पाँच करोड १४ लाख ७९ हजार पाँच सय ६६ रुपैयाँ बढी राजस्व सङ्कलन गरेको हो । 
यातायात व्यवस्था कार्यालय झापाका निमित्त प्रमुख गोपीचन्द्र बोहराका अनुसार आर्थिक वर्ष २०७९/८० मा ८८ करोड ६ लाख ८७ हजार दुई सय ४७ रुपैयाँ राजस्व सङ्कलन भएको थियो । गत आर्थिक वर्ष २०८०/८१ मा २० हजार ६३ कूल सवारी दर्ता हुँदा १९ हजार नौ सय २० सवारी चालक अनुमतिपत्र वितरण भएको उहाँले बताउनुभयो । यसैगरी कार्यालयले सवारी जाँचपास ११ हजार चार सय ४१ र रुट अनुमति पाँच सय ३४ दिएको थियो । 
गत आर्थिक वर्ष २०८०/८१ मा सबैभन्दा धेरै सात हजार ६ सय १५ मोटरसाइकल दर्ता हुँदा एक हजार सात सय पाँच इ–रिक्सा दर्ता भएको यातायात व्यवस्था कार्यालय झापाले जनाएको छ । कार्यालयका अनुसार बस एक सय ५६, मिनिबस १०, माइक्रोबस १८, जिप एक सय ६०, कार दुई सय ७०, भ्यान एक सय ३६, पिकअप एकस २९, ट्र्याक्टर एक सय ४५, ट्रक ७८, मिनिट्रक १४ टिपर १४ गत आर्थिक वर्षमा दर्ता भएका छन् । 
दर्ता भएका जम्मा सवारीमध्ये एक हजार दुई सय ५७ सार्वजनिक, नौ हजार चार सय ४९ निजी, ११ सरकारी, १३ लिलाम दर्ताका र एक हजार नौ सय ७५ सवारी सरुवा दर्ता अन्तर्गत रहेको यातायात कार्यालय झापाले जनाएको छ ।  
निमित्त कार्यालय प्रमुख बोहराले हप्ताको चार दिन (आइतबारदेखि बुधबार) चालक अनुमतिपत्रको लिखित परीक्षा र हप्ताको पाँच दिन (आइतबारदेखि बिहीबार) चालक अनुमतिको प्रयोगात्मक परीक्षा सञ्चालन हुने गरेको जानकारी दिनुभयो । ००००००
 

प्रतिकृया दिनुहोस