विर्तामोड, १४ असोज ।

झापाको बिर्तामोड–१० ठुटेबरमा भएको मोटरसाइकल दुर्घटनामा परी चालकको मृत्यु भएको छ । आइतबार बेलुका राति करिब ८ः३० बजे बिर्ताबजारबाट सैनिकबजारतर्फ जाँदै गरेको प्र १–०१–०१२ प ५८९१ नम्बरको मोटरसाइकल अनियन्त्रित भई पल्टिँदा २७ वर्षीय अनिस न्यौपानेको ज्यान गएको हो ।
प्रहरीका अनुसार मोटरसाइकल विपरीत दिशाबाट आइरहेका साइकलयात्रीलाई जोगाउने क्रममा अनियन्त्रित भई पल्टिएको थियो । दुर्घटनामा चालक अनिस न्यौपाने गम्भीर घाइते भएका थिए । टाउको र दुबै खुट्टामा चोट लागेका न्यौपानेलाई उपचारका लागि बीएण्डसी हस्पिटल पुर्याइएको थियो, जहाँ उपचारकै क्रममा आज मृत्यु भएको जिल्ला ट्राफिक प्रहरी कार्यालय झापाले जनाएको छ ।
मोटरसाइकलमा पछाडि सवार, बिर्तामोड–१० का ३८ वर्षीय टिकाराम राय पनि दुर्घटनामा घाइते भएका छन् । रायको अवस्था सामान्य रहेको र बीएण्डसी अस्पतालमा उपचारपछि घर फर्किएको प्रहरीले जनाएको छ । दुर्घटना भएको मोटरसाइकल अस्थायी प्रहरी चौकी सैनिकबजारमा रहेको छ । ०००००