बिर्तामोड, १० साउन ।
झापाको बिर्तामोडस्थित धौला पुलदेखि देउनिया चोकसम्मको सम्पूर्ण कालोपत्रे गर्ने कार्य बर्खाले अवरोध नभएमा साउन मसान्तसम्म सक्नेलगायतका पाँच बुँदे प्रतिवद्धता जनाएपछि स्थानीयले बिर्तामोड– भद्रपुर सडकखण्डको बन्द फिर्ता लिएका छन् ।
जिल्ला प्रशासन कार्यालयमा आज भएको छलफलमा पाँच बुँदे सहमतिसँगै दुई दिनदेखिको अवरोध आज बेलुकादेखि हटेको छ  । सहायक प्रमुख जिल्ला अधिकारी विश्वराज नेपालसहित , सडक डिभिजन कार्यालय झापाका प्रतिनिधि ,वडाध्यक्ष , स्थानीयसहितको छलफलमा त्यस्तो सहमति भएको हो ।
धौला पुलदेखि देउनिया पुलसम्मको सडकखण्डको उत्तरपट्टिको लेनमा साउन ११ गतेबाट सवबेस , ग्रेडर , रोलर पानीटंकी प्रयोग गरी करेक्सन गर्ने , चियावारी कल्भर्टदेखि देउनिया चोकसम्म बाँकी रहेको निर्माण कार्य गर्न सर्वप्रथम बेस करेक्सन गरी बेस कोर्सको सम्पूर्ण मापदण्ड पुर्याई निर्माण कार्य अघि बढाउने , दक्षिणपट्टि बेस करेक्सन गर्ने कार्य उत्तरपट्टिको सबवेस करेक्सन गर्ने कार्य सकिनासाथ सुरु गर्ने , निरन्तर रुपमा पानीटंकी प्रयोग गरी धुलो मार्ने कार्य गर्नेलगायतका प्रतिवद्धता सडक डिभिजन कार्यालय दमक झापाले जनाएको छ । छलफलमा सडक डिभिजन कार्यालय दमक झापाका इन्जिनियर किरण श्रेष्ठ, प्रज्वल खतिवडा, सहायक इन्जिनियर नरेन्द्रकुमार माझी, बिर्तामोड–८ का वडाध्यक्ष अजय कार्की, स्थानीय हरि पाण्डे, अनिल गौतम, राजन खरेल, इन्द्रकमल पौडेल, गोबिन्द पाठकलगायतको उपस्थिति रहेको थियो ।
बुधबार बिहान सवा ९ बजेदेखि बिर्तामोड – चन्द्रगढी सडकखण्डमा बाँस र ढुङ्गा राखेर उनीहरुले सडक अवरुद्ध शुरु गरेका थिए । बुधबार दिउँसो ४ बजेदेखि प्रहरीले अवरोध हटाएकोमा आज विहानदेखि स्थानीयहरुले फेरि अवरोध गरी सवारीसाधन चल्न दिएका थिएनन् । सडक निर्माणको कार्यमा ढिलासुस्ती भएको, धुँवा धुलोले दैनिक जीवनयापन कष्टकर भएको भन्दै बिर्तामोड ८ का वडाध्यक्ष कार्कीको नेतृत्वमा स्थानीयहरुले चक्काजाम गरेका थिए । ००००००००