झापा, २० चैत ।
राजावादीहरूको आक्रमण र आगजनीका कारण जडीबुटी उत्पादन तथा प्रशोधन कम्पनी लिमिटेडमा २८ करोड रुपैयाँभन्दा धेरैको क्षति भएको छ ।
दुई वटा भवनसहित कच्चा पदार्थ, कम्पनीको प्रयोगशाला, उत्पादनमा प्रयोग हुने स्वचालित मेशिनहरू र गाडीहरू समेत जल्दा २८ करोड रुपैयाँभन्दा धेरै क्षति भएको प्रारम्भिक अनुमान गरिएको कम्पनीकी महाप्रबन्धक सङ्गीता यादवले बताउनुभयो । यो भौतिक क्षतिसँगै उत्पादनमा परेको असरले अरू धेरै क्षति हुने उहाँले बताउनुभयो ।
२०३८ सालमा स्थापित सरकारको स्वामित्व भएको यो कम्पनीले विभिन्न औषधियुक्त एवम् सुगन्धित जडीबुटीहरूको सङ्कलन र प्रशोधन गर्दै आएको छ । कम्पनीले सञ्चो, भिक्स, हिमालय मसाज तेल, सञ्चो जटा केश तेल लगायत उत्पादन गर्दै आएको छ । अहिले सुनसरी, बारा र कैलालीमा कम्पनीका शाखाहरू रहेका छन् । भर्खरै मात्र जाजरकोटमा पनि अर्को शाखा उद्घाटन भएको थियो ।
महाप्रबन्धक यादवका अनुसार बितेको चार वर्षदेखि कम्पनीले युरोपेली देश स्वीडेनमा आफ्ना उत्पादन निर्यात गरिरहेको छ । त्यसबाहेक अनौपचारिक रूपमा नेपालीहरू रहेका सबैजसो देशमा आफ्ना उत्पादन पुग्ने गरेको यादवको भनाइ छ । पुरानो मेशिनबाट उत्पादन गर्ने अवस्था चाँडै गर्ने तर पुनः स्वचालित मशिनहरू र प्रयोगशाला बनाएर चलाउन आन्तरिक बजेटले सम्भव नभएको कम्पनीको भनाइ छ । ०००००