झापा, २० चैत ।
गएको चैत १५ गते राजावादीको प्रदर्शनका क्रममा कोटेश्वरमा रहेको भाटभटेनी सुपर स्टोर लुट्न पुगेकाहरूसँग एक्लै प्रतिकार गरेका सुरक्षाकर्मी दुलप्रसाद पराजुली सम्मानित हुनुभएको छ ।
पराजुलीलाई आज एक कार्यक्रमकाबीच भाटभटेनीका सञ्चालक मीनबहादुर गुरुङले नगद पाँच लाख एक हजार एक सय ११ रुपैयाँसहित सम्मान गर्नुभएको हो । उहाँले नगद पुरस्कारसहित एक फुली र पाँच ग्रेडको बढुवा पनि पाउनुभएको छ । पराजुली २२ वर्षदेखि भाटभटेनीमा कार्यरत हुनुहुन्छ ।
गएको १५ गते भाटभटेनी लुट्न पुगेकाहरूमाथि उहाँले लाठी प्रहार गर्दै लखेटेको भिडियो सामाजिक सञ्जालमा भाइरल भएको थियो । यस्तै कार्यक्रममा अन्य कर्मचारीहरूले पुरस्कार र सम्मान पाएका छन् ।
यसैबीच, भाटभटेनीका सञ्चालक गुरुङले १५ गतेको प्रदर्शनका क्रममा ज्यान गुमाएका एभिन्युज टेलिभिजनका फोटो पत्रकार सुरेश रजकको परिवारलाई ५ लाख र सबिन महर्जनको परिवारलाई ३ लाख रुपैयाँ आर्थिक राहत दिने घोषणा गर्नुभएको छ । ०००००