धरान (सुनसरी), २० चैत ।
कोशी प्रदेश प्रिमियर लिगको आयव्यय सार्वजनिक गरिएको छ । धरानको एन्फा एकेडेमीमा आज आयोजित पत्रकार सम्मेलनमा प्रदेश फुटबल सङ्घका कोषाध्यक्ष आनन्द चौधरीले लिगको आयव्यय सार्वजनिक गर्नुभएको हो ।
सार्वजनिक गरिएको आयव्यय अनुसार कोशी प्रदेश प्रिमियर लिगबाट ६ लाख ९० हजार रुपैयाँ नाफा भएको छ । कोषाध्यक्ष चौधरीका अनुसार लिग सञ्चालन गर्दा ३६ लाख ६७ हजार रुपैयाँ सहयोग जुटेको थियो भने २९ लाख आठ हजार रुपैयाँ खर्च भएको थियो । लिग सञ्चालन गर्न कोशी प्रदेश सरकारको २० लाख रुपैयाँ तथा अखिल नेपाल फुटबल सङ्घ (एन्फा)को १५ लाख रुपैयाँ खर्च भएको थियो ।
यसैगरी, गोर्खा ब्रुअरीबाट ५० हजार रुपैयाँ, रेडबुलबाट ५० हजार रुपैयाँ, धरानका पूर्व खेलाडीहरुबाट ३७ हजार रुपैयाँ तथा अन्य दाताबाट ३० हजार रुपैयाँ जुटेको थियो । नगद पुरस्कारमा सात लाख ६५ हजार रुपैयाँ, पहाडी जिल्लाका क्लबलाई तयारी खर्चवापत चार लाख २० हजार रुपैयाँ, तराईका जिल्लालाई विशेष तयारीवापत दुई लाख रुपैयाँ तथा रेफ्रिलगायतमा तीन लाख ५० हजार रुपैयाँ खर्च भएको कोशी प्रदेश फुटबल सङ्घका अध्यक्ष किशोर राईले बताउनुभयो । 
कोशी प्रदेश प्रिमियर लिग गत माघ २८ गतेदेखि फागुन ८ गतेसम्म धरान उपमहानगरपालिका–१६ स्थित रङ्गशालामा सञ्चालन भएको थियो । लिगमा कोशी प्रदेशका ११ क्लबको सहभागिता रहेको थियो । ०००००