भोजपुर, २१ चैत ।
भोजपुर नगरपालिका–८ ले फुसको छाना विस्थापित गरेको छ । वडा कार्यालयले आर्थिक वर्ष २०८१/८२ को योजना तथा कार्यक्रमबाट तीन वटा घरको फुसको छाना हटाएर टिनको छाना लगाएको हो । 
वडामा आएको बजेटबाट फुसको छाना हटाउने अभियान थालेको वडाध्यक्ष नवीन प्रधानले बताउनुभयो । चालु आर्थिक वर्षमा विनियोजन गरिएको डेढ लाख रुपैयाँबाट वडावासी भिमा तामाङ, कुमार तामाङ र स्याउमाया तामाङको घरको फुसको छाना हटाएर जस्ता लगाइएको वडाध्यक्ष प्रधानले जानकारी दिनुभयो । कार्यक्रमका लागि छनोट भएका तीन घरका लागि वडाको बजेटबाट जस्तापाता खरिद गरिएको थियो भने सम्बन्धित लाभग्राहीले काठ र श्रमदान उपलब्ध गराएका थिए । 
योसँगै वडामा अब फुसको छानो भएको घर पूर्णरुपमा नरहेको वडाध्यक्ष प्रधानको भनाइ छ । वडाध्यक्ष प्रधानले भन्नुभयो, “फुसको छानाका कारण हावाहुरीको समयमा अत्यधिक आगलागीका घटना हुने र त्यसबाट धनजनको क्षति हुने, बर्सेनि परालको छानो हाल्नुपर्ने समस्यालाई दृष्टिगत गरी वडामा फुसको छानो विस्थापित गर्ने योजना सञ्चालन गरेका हौं ।”
वडाको सहयोगमा घरमा जस्ताको छानो लगाउन पाएकामा स्थानीयसमेत खुसी हुनुभएका छन् । “घरमा जस्ताको छानो लगाइएको छ, अब भने बर्सेनि फुसको छानो छाउनुपर्ने बाध्यता हटेको छ”, लाभग्राही कुमार तामाङले भन्नुभयो । ०००००००