झापा, २१ चैत ।
साहित्यकार तेजराज खतिवडा (तेराख) प्रतिष्ठानले नेपाली भाषा, साहित्य, संस्कृति र वातावरणको संरक्षणमा योगदान पु¥याएवापत दुई जना साहित्यकारसहित चार जनालाई पुरस्कृत गर्ने भएको छ ।
प्रतिष्ठानको आज सम्पन्न बैठकले भारतको पश्चिम बंगालस्थित सिलगढीका नेपाली साहित्यकार ज्ञानेन्द्र खतिवडा र भद्रपुर निवासी साहित्यकार विरही अधिकारीलाई तेराख महाकवि देबकोटा साहित्य पुरस्कार प्रदान गर्ने निर्णय भएको प्रतिष्ठानका अध्यक्ष शिवकुमार पौड्यालले बताउनुभयो । उक्त पुरस्कारको नगद राशी जनही ५१ हजार रुपैयाँ रहेको छ । आगामी वैशाख १३ गते धुलाबारीमा एक समारोहबीच दुबै पुरस्कार प्रदान गरिने उहाँले जानकारी दिनुभयो ।
यसैगरी, धुलाबारी माध्यमिक विद्यालयकी कक्षा १२ की छात्रा स्मृति लिम्बुलाई पदमादेवी छात्रा पुरस्कार र बुद्धशान्ति गाउँपालिका वडा नं. ६ का राजेन्द्र भट्टराईलाई मधुसुदन कृषि पुरस्कारबाट सम्मान गर्ने निर्णय भएको छ । दुबै पुरस्कारको नगद राशी जनही २१ हजार रुपैयाँ रहेको छ । लिम्बुलाई नवप्रतिभाको रुपमा र भट्टराईलाई कृषि तथा वातावरणको संरक्षणमा योगदान पुर्याए वापत सम्मान गर्ने निर्णय भएको प्रतिष्ठानका अध्यक्ष पौड्यालले बताउनुभयो ।
यसैबीच, भानु साहित्यिक परिवार मेचीनगरको अध्यक्षमा डिल्लीराम घिमिरे सर्वसम्मत चयन हुनुभएको छ । उपाध्यक्षमा सुशिल आचार्य, महासचिवमा लक्ष्मीप्रसाद उप्रेती, सचिवमा कृष्णकान्त खनियाँ र कोषाध्यक्षमा कृष्णप्रसाद खरेल चयन हुनु भएको छ । काँकडभिट्टामा कार्यालय रहेको प्रतिष्ठान झापा जिल्लाकै अग्रणी साहित्यिक संस्था हो । प्रतिष्ठानले भानु जयन्तीका अवसरमा एक लाख रुपैयाँ राशीको भानु साहित्य पुरस्कार लगायत दर्जनौं सम्मान प्रदान गर्दै आएको छ । ००००००