विर्तामोड, ३ माघ ।
खो–खो विश्वकपमा नेपाली महिला टोली लगातार चौथो जीतसहित क्वाटरफाइनलमा पुगेको छ ।
आज भएको समूह चरणको अन्तिम खेलमा बङ्गलादेशलाई ८३–२४ ले हराएको हो । नेपाली महिला टोलीले पहिलो खेलमा भुटान, दोस्रो खेलमा जर्मनी र तेस्रो खेलमा श्रीलङ्कालाई हराएको थियो ।
यस्तै खो–खो विश्वकपको पुरुषतर्फ नेपालले लगातार तेस्रो जीत हासिल गरेको छ । समूह चरणको अन्तिम खेलमा आज भुटानलाई ९८–८ ले हराउँदै नेपालले तेस्रो जीत हासिल गरेको हो । यसअघि नेपालले ब्राजिल र पेरुलाई हराएको थियो भने भारतसँग पराजित भएको थियो ।
खो–खो विश्वकपको क्वाटरफाइनल खेल भोलि हुनेछन् । यस्तै फाइनल खेल आउँदो आइतवार हुनेछ । ०००००